Philippine Information Agency Bicol

'Operation Baklas' pinangunahan ng DENR katuwang ang MFPC

By Benilda A. Recebido

LUNGSOD NG SORSOGON, Abril 22 (PIA) -- Nagsasagawa ngayong araw ng "Operation Baklas" ang mga tauhan ng Department of Environment and Natural Resources – Provincial Environment and Natural Resources Office (DENR-PENRO) katuwang ang Multi-Sectoral Forest Protection Council (MFPC) sa mga bayan sa unang distrito ng Sorsogon.

Ito ay dahil sa kabila ng panawagang ginagawa ng mga ahensya ng pamahalaan at iba pang mga environment concerned group, makikita pa rin sa mga punong nakatanim sa kahabaan ng pambansang lansangan at maging sa mga puno sa road right-of-way ang ginagawang paglabag

Marami pa ring makikitang mga nakapaskil o ipinako sa puno na mga business advertisement, partikular na ang mga campaign poster.

Ayon kay MFPC Chairman Andy Espinar, ang operasyon ay bilang pagpapaigting pa ng kampanya ng DENR na mapangalagaan ang mga puno at maiiwas ito sa pagkakasugat at pagkamatay dahilan sa nakapakong mga business advertisement at campaign poster lalo ngayong magkakaroon ng halalan sa Mayo 13, 2013.

Bahagi din umano ang aktibidad sa pagdiriwang ng Earth Day ngayong araw kung saan muli nitong ipinapaalala sa publiko ang pagmamahal at pag-iwas sa anumang uri ng aktibidad na makasisira sa mundo.

Una nang nanawagan si Regional Executive Director Gilbert Gonzales ng DENR sa mga pulitiko at taga-suporta nito na gawing malinis ang gagawing pangangampanya, iwasan ang pagkakalat ng mga basura at ikabit lamang ang mga campaign poster sa itinakdang common poster area ng Commission on Election.

Isinusulong din ng DENR Bicol ang Clean and Trash Free Election.

Alinsunod sa Presidential Decree 953, bawal ang pagpapako o pagpaskil ng anumang mga poster o iba pang mga paraphernalia sa puno ng kahoy. Ang mapapatunayang lumabag ay papatawan ng mula sa anim na buwan hanggang dalawang taong pagkakakulong at penalidad na P500 hanggang P5,000.

Maging sa Section 23 ng Comelec Resolution 7767 karugtong ng Republic Act 9006 o Fair Election Act, mahigpit ding ipinagbabawal ang pagdidikit, pagpapako ng mga campaign poster sa mga puno ng kahoy. (MAL/BAR-PIA5 Sorsogon)


Usapin sa Batas Kasambahay, inilahad sa talakayan sa Sorsogon

By Benilda A. Recebido

LUNGSOD NG SORSOGON, Abril 22 (PIA) -- Aktibo ang naging diskusyon sa isinagawang consultation workshop ukol sa Implementing Rules and Regulations ng “Batas Kasambahay” o ang RA 10361 noong Martes, Abril 16, sa Mango Grill, lungsod ng Sorsogon.

Dinaluhan ng mga kinatawan ng mga ahensya ng pamahalaan tulad ng PhilHealth, Social Security System, Philippine Information Agency, Department of Education, Philippine National Police; mga opisyal ng Public Employment Service System at Liga ng Barangay sa Pilipinas-Sorsogon Chapter; kinatawan ng tri-media; at iba pang mga stakeholder, ilang mga isyu din ang natalakay at ilan naman ang naghayag ng mga saloobin ukol sa kanilang hindi pagpabor sa nasabing batas.

Partikular na hindi pumapabor ang ilang kinatawan ng media at mga naroroong employer na karamihan ay nasa middle class lamang. Anila ay masmagiging magastos sa kanila sakaling tuluyan nang maipatupad ang Batas Kasambahay, maliban pa sa hindi rin umano masyadong napag-uusapan sa batas ang magiging proteksyon din ng mga employer o amo.

Ipinahayag pa nila na hindi nila tinututulan ang paggawa ng mga batas subalit inaasahan nila na hindi ito mangangahulugan ng malaking gastos sa bahagi ng mga ordinaryong mamamayang magpapasweldo ng mga kasambahay bago pa man ito pumasok ng panunungkulan sa kanila.

Ilan din sa mga napag-usapang isyu ay ang hindi magkatugmang patakarang nakasaad sa Rule IV section 16 ng Batas Kasambahay at sa RA 8282 ng SSS ukol sa araw kung kailan dapat na mabigyan ng kaukulang benepisyo ang mga kasambahay. Nakasaad sa RA 8282 na ipinatutupad ng SSS na dapat na mai-enrol ang kasapi sa kanila sa unang araw na nagtrabaho ang kasambahay habang sa RA 10361 naman ay dapat na di bababa sa isang buwan.

Dagdag pa nila, na kung kasangkot na ang punong barangay sa paggawa pa lamang ng kontrata sa pagitan ng kasambahay at paglilingkuran nito, dapat ding isali ang punong barangay sakaling magkaroon ng suliranin ang kasambahay at amo nito. Nagmungkahi rn ang grupo ng mga media na sana’y maglagay din ng Barangay Help at Monitoring Desk.

At upang maproteksyunan din umano ang mga employer sa mga nang-aabusong kasambahay partikular sa pinansyal na aspeto, dapat na maglagay din ng ‘ceiling’ para sa mga cash advance na kalimitang nangyayari sa pagitan ng amo at kasambahay.

Wala din umanong nakasaad na probationary period sa kontrata o di kaya’y malinaw na patakaran sakaling hindi magustuhan ang serbisyo o may magawang mabigat na kasalanan ang kasambahay sa mga unang araw pa lamang ng paninilbihan nito.

Ang Batas Kasambahay ay nilagdaan ni Pangulong Benigno Aquino III noong January 18, 2013. Alinsunod sa isinasaad sa Rule XIII ng iminumungkahing IRR, magiging “Araw ng mga Kasambahay” ang ika-18 ng Enero taon-taon.

Inaasahang sa Araw ng Paggawa o “Labor Day” sa Mayo 1, 2013 ay tuluyan nang maipatutupad ang nasabing batas na magsisilbing proteksyon ng mga kasambahay laban sa mga pang-aabuso ng mga pinaglilingkuran nito. (MAL/BAR/PIA5 Sorsogon)