Masbateño news: DSWD naghiwat san assessment sa KALAHI antipoverty projects sa Masbate

By Rogelio Lazaro

CIUDAD SAN MASBATE, Hunyo 21 (PIA) -- Guin hiwat yana na adlaw san Department of Social Welfare and Development an assessment sa antipoverty projects na guin patuman sa probinya san Masbate sa idalom san KALAHI-CIDSS.

Nanguna si KALAHI-CIDSS regional coordinator Ariel Razo sa inspection san health center, school buildings kag water systems na guin tindog sa magkapira na lugar na nagatios sa munisipyo san Palanas.

Ang kadakuan san pondo sa KALAHI-CIDSS naghali sa World Bank.

Nag-ambag man an lokal na gobierno kag mga pumuluyo sa beneficiary communities.

Susog sa ebalwasyon na guin himo san World Bank sa mga nauna na proyekto, naging matagumpay an KALAHI-CIDSS na hatagan san katukduan an 13,000 na community volunteers kag mapadako an partisipasyon san mga pumuluyo sa preparasyon san local development plans.

Apwera sani, napadako man san KALAHI-CIDSS an pondo na natipon para mahimo an priority projects sa mga magatios na lugar dahilan kay mismo an mga pumuluyo an naghiwat san implementasyon sani.

Kaupod ni Razo sa inspection san mga proyekto sa Palanas an mga representates hali sa mga kaabaga na ahensiya para sa KALAHI-CIDSS.

Kaupod san mga ahensya an Department of Education, Department of the Interior and Local Government, Department of Public Works and Highways, Department of Agrarian Reform kag Philippine Information Agency. (MAL/RAL-PIA5 Masbate)

Masbateño news: Poverty reduction program san DSWD, magahatag trabaho sa Masbate

By Rogelio Lazaro

CIUDAD SAN MASBATE, Hunyo 21 (PIA) -- Kinahanglan san Department of Social Welfare and Development san lampas singkwenta katawo para sa community-driven poverty reduction program na KALAHI-CIDSS na ipapatuman sa Masbate tuna sa masunod na bulan.

Segun sa regional project coordinator na si Erwin Razo, an KALAHI-CIDSS o Kapit-Bisig Laban sa Kahirapan-Integrated Delivery of Services ipapatuman sa munisipyo san Mobo kag Cawayan sa Hulyo kaya kinahanglan ninda san dugang na manpower.

Sinabi ni Razo na nagabaton na an inda opisina san mga aplikante para sa mga posisyon na: area coordinator, team leader, project manager, financial analysts, community organizers kag community facilatators.

Guin hangyo ni Razo sa mga interesado na magdara san resume, letter of application, transcript of record, certificates kag iba pa na credentials kag ipasa sa DSWD regional office sa Legazpi City.

An igwa san relevant experience sa community organizing kag development work guina inkaher ni Razo na mag-aplay.

Segun saiya, mas matahom kun mismo mga pumuluyo sa Masbate an maging tawohan kay guina maw-ot ninda na maitaas an partisipasyon san mga tawo sa probinsya.

An KALAHI-CIDSS yana na tuig itataas kag popormahon na programa nasyonal na tatawagon na National Community Driven Development Program. Ini na programa magahatag san kaginhawaan sa mga munisipyo na an poverty incidence lampas sa national average na 26.5 percent. (MAL/RAL-PIA5 Masbate)