CIUDAD SAN MASBATE, Nob. 25 (PIA) – Ginatos na propesyonal sa probinsya san Masbate na paso na an lisensya hali sa Professional Regulations Commission an makatipid sa gastos dahilan kay mapadara an komisyon san iya mga sinakupan para iproseso an panibag-o na lisensya san mga aplikante.
Maabot sa ciudad san Masbate an PRC team hali sa Legazpi City sa Miyerkules, Nob. 27, kag sa sulod san duha kaadlaw inda ipoproseso an mga aplikasyon para sa bag-o na lisensya san mga maestro/maestra, enhinyero, nars kag iba pa na propesyonal.
An mobile licensing service sa PRC sa maabot na semana pangduha na san ahensya sa Masbate City sa presente na tuig. Naghiwat san pareho na serbisyo an PRC san Hunyo sani na tuig.
An lisensya hali sa PRC an magahatag sa isad na propesyonal san otoridad na magpraktis san iya propesyon sa sulod san tulo katuig.
Matitipid san mga aplikante an dako na parte sa sobra tres mil de pesos na inda magagastos sa duha kaadlaw na pagtiner kag biyahe kun makadto pa sinda sa ciudad san Legazpi o Cebu para kumuha san bag-o na lisensya.
Kadamuan sa mga aplikante hali pa sa haragyo na munisipyo sa isla san Masbate kag isla san Ticao.
Apwera sa pagproseso san renewal san mga lisensya, ididistribwer man san PRC team an license cards na nauna na guin renewed.
Dagdag pa didi, magarehistro man an PRC team sa mga aplikante para sa masunod na Licensure Examination for Teachers.
Segun kan City Councilor Andrie Diez, nagbugkos pwersa an administrasyon ni City Mayor Rowena Tuason kag an PRC agod mahatag an serbisyo san PRC sa mga propesyonal sa Masbate.
An mga Masbatenyos na interesado sa nahunambitan na serbisyo san PRC pwede makipagkita kan Diez sa Legislative Buillding sa City Hall o tumawag sa mobile No. 09076555777 para dugang na mga detalye. (MAL/RAL-PIA5/Masbate)
No comments:
Post a Comment