VP Binay pinarangalan mga Bicol LGU sa pagtugon sa land use plan

By Joseph John J. Perez

LUNGSOD NG LEGAZPI, Mayo 3 (PIA) -- Ang lungsod na ito at bayan ng Basud sa Camarines Norte ang nanguna sa 33 lokal na pamahalaan sa Bicol sa pagtanggap ng Comprehensive Land Use Plan (CLUP) Zero Backlog Program Awards ng Housing and Land Use Regulatory Board (HLURB).

Ito ay iginawad ni Vice-President Jejomar Binay sa isang seremonya na isinagawa sa lungsod ng Legaspi noong Linggo.

“Labing-apat na LGUs dito ang nakagawa na ng CLUPs at dalawa ang aprubado na ang CLUP ng kanilang Sangguniang Panlalawigan, ang Legaspi City at Basud Camarines Norte,” sabi ni Binay.

Layunin ng CLUP Zero Backlog Program ng HLURB na tulungan ang lahat ng mga lokal na pamahalaan na mag-update o bumuo ng kanilang CLUP, ayon kay Binay. “Ang CLUP ay pagpapahayag at gabay para sa lokal na pag-unlad,” sabi ni Binay.

Pinagdiinan ni VP Binay ang kahalagahan ng CLUP bilang hinihingi sa mga LGUs sa ilalim ng Local Government Code. “Ito ang mapa upang matupad nila ang kanilang adhikain, hindi lamang isinasaad nito ang iba't ibang gamit sa lupain ng lungsod o munisipyo, ito rin ay gabay ng mga LGU sa pagtiyak ng mga lugar na prayoridad sa paglinang,” sabi ni Binay.

Nagbigay halimbawa din si VP Binay sa paglalagay ng kalsada mula sakahan hanggang palengke na sa gabay ng CLUP, maiiwasan ang pagpapagawa ng kalsada sa mga lugar na hindi naman dinadaanan o malayo sa mga bukid ng mga mangangailangan dito.

Dahil din sa masusi na pag-aaral sa mga lupa at lugar, maiiwasan din sa pamamagitan ng CLUP ang pagpapatayo ng bahay kung saan dumaraan ang mga baha at nailalagay sa malaking panganib o pinsala ang pamumuhay ng ating mga kababayan, ayon pa kay Binay.

Parehas na nakuha ng lungsod ng Legaspi at Basud ang Gold Category Award habang iginawad sa Juban ng Sorsogon ang Silver Category Award. Labing-isa na mga LGU ang idineklarang Bronze Category Awardees na binubuo ng Daraga, Jovellar, Malilipot, Rapu-Rapu at Sto. Domingo sa Albay; Daet at Talisay sa Camarines Norte; Milaor at Minalabac sa Camarines Sur; Masbate City at San Pascual sa Masbate.

Labing-siyam na mga LGU naman ang binigyan ng certificates of completion na binubuo ng Tabaco City at Tiwi sa Albay; Capalonga sa Camarines Norte; Baao, Bombon, Buhi, Bula, Canaman, Caramoan, Presentacion, Sagñay at Tigaon sa Camarines Sur; Aroroy, Claveria, Milagros, Mobo, Palanas, San Fernando at San Jacinto sa Masbate.

Pinaalalahanan din ni Binay ang mga LGU na wala pang CLUP o hindi pa nakapag-update nito na hindi siya magsasawa sa pag-uulit-ulit ng kahalagahan nito. “Ang pagsasagawa ng CLUP ay hindi madali subalit kapag natapos na at sinusunod ito sa pagpapatupad ng mga proyekto, tiyak na aanihin ang resulta ng pinaghirapan,” sabi ni Binay. (MAL/JJJP-PIA5/Albay)

Clean up drive isinagawa ng mga sundalo sa Camarines Norte

By Reyjun Villamonte

DAET, Camarines Norte, Mayo 3 (PIA) -- Tulong-tulong sa pamamagitan ng Bayanihan ang mga kasundaluhan kaugnay sa isinagawang clean up drive noong ika-1 ng Mayo ngayong taon sa barangay Tulay na Lupa ng bayan ng Labo.

Pinangunahan ito ng pamunuan ng 902nd Infantry Brigade ng Philippine Army dito katuwang ang mga opisyal ng naturang barangay.

Nakiisa din mula sa mga kinatawanan at mga miyembro ng non-government organizations (NGOs) kabilang ang Guardians of the Philippines (GPII) Tulay na Lupa Chapter, Wild Life Enforcement Officer (WEO), Abasig Malapat Watershed Association Incorporated (AMWAI), Samahan ng Boluntaryong Mamamayan katuwang ng barangay para sa Kapayapaan, Kalinisan at Kaunlaran (KKK), Tulay na Lupa Watershed Service Association at Pagasa Youth Association of the Philippines (PYAP).

Ito’y bahagi ng “OPLAN LINIS SAPA” ng pamunuan ng 902nd Brigade na idinaos upang maipagpatuloy ang pangangalaga ng kalikasan partikular na ang kalinisan ng sapa at paligid nito.

Ayon kay Col. Richard Q. Lagrana, INF (GSC) PA, commander ng naturang pamunuan, maliban sa kanilang “OPLAN BERDE” ay susuportahan din ng mga sundalo ang programa ng pamahalaang nasyunal ang National Greening Program.

Aniya, layunin nito na maging malinis ang kapaligiran para sa malusog na sambayanan.

Ayon pa rin sa opisyal, sa pamamagitan ng Bayanihan ng mga stakeholders ay maisasagawa ang epektibong pangangalaga ng ating kapaligiran at maiiwasan ang mga karamdaman na nagmumula sa maruming kapaligiran. (MAL/ROV-PIA5 Camarines Norte)

Opisyal ng mga barangay sa Castilla pangungunahan ang 'blood donation'

By Benilda A. Recebido

LUNGSOD NG SORSOGON, Mayo 3 (PIA) -- Nagkaisa ang mga opisyal ng 34 na mga barangay sa bayan ng Castilla, Sorsogon para isang blood donation activity ngayong araw.

Sa ulat na ipinaabot sa PIA Sorsogon, alas-otso kaninang umaga sinimulan ang libreng pagpapakuha ng dugo ng mga barangay official sa Castilla.

Layunin ng hakbang na ito na makalikom ng kaukulang bilang ng dugo at maibigay sa Department of Health nang sa gayon ay may magamit ang mga pasyente sa panahon ng pangangailangan.

Matatandaang isa ang pangangailangan sa dugo sa mga kinakaharap na suliranin at kakulangan sa mga ospital kung saan kailangan pang maghanap ng dugo o blood donor para sa pasyente lalo na ang mga nanganganak.

Kaugnay nito, nanawagan din ang LGU-Castilla sa iba pang mga lokal na pamahalaan sa Sorsogon na gawin ding aktibidad sa mga barangay ang blood donation lalo pa’t hindi lamang ang mga mangangailangang pasyente ang madudugtungan ang buhay kundi nakakatulong din ito sa taong magbibigay ng dugo upang muling mapalitan ng bago ang dugong dumadaloy sa kanyang mga ugat na magiging susi upang higit na maging malakas at makapagpapabata pa sa kanya. (MAL/BAR/PIA5-Sorsogon)

MOA para sa 10-taon solid waste management plan, pinirmahan

By Benilda A. Recebido

LUNGSOD NG SORSOGON, Mayo 2 (PIA) -- Isinagawa sa lungsod ng Legazpi ang konsultasyon ukol sa Solid Waste Management Plan (SWMP) para sa lokal na pamahalaan ng Sorsogon at pinirmahan ang Memorandum of Agreement (MOA) kaugnay sa binuong plano ng solid waste management program ng nasabing lalawigan.

Ayon kay Environmental Management Bureau (EMB) Regional Director Roberto D. Sheen ng Department of Environment and Natural Resources (DENR), nagtipon ang mga kinatawan ng Provincial Solid Waste Management (PSWM) Council at mga punong ehekutibo para sa 14 na mga bayan at isang lungsod ng Sorsogon nang sa gayon ay lubusang maunawaan ng mga ito ang binuong plano at ang gagawing pagpapatupad nito.

Kasabay nito ay ang pirmahan ng MOA para sa pagsusulong ng 10 taong Provincial Solid Waste Management Plan ng Sorsogon upang higit pang mapagtibay ito at magkaroon ng iisang direksyon sa pagpapatupad ng plano alinsunod sa mga napagkasunduan.

Tinalakay din umano sa nasabing pagtitipon ang mga pinakahuling kaalaman, polisiya at mga mahahalagang probisyong nakapaloob sa Republic Act 9003 o ang Philipphine Ecological Solid Waste Management Act of 2000, at ang papel na gagampanan ng LGU.

Ayon pa kay RD Sheen, magiging basehan din ang ang 10-yr Provincial Solid Waste Management Plan na ito para sa mas epektibong "ecological solid waste management program" ng rehiyon ng Bicol.

Ang aktibidad ay pinangunahan ng EMB katuwang ang National Solid Waste Management Commission (NSWMC) kung saan inaasahan din ang pagdating ni NSWMC Deputy Executive Director Engr. Eligio Ildefonso. (MAL/BAR/PIA5-Sorsogon)



Presyo ng mga pangunahing bilihin, sinusubaybayan ng DTI

By Benilda A. Recebido

LUNGSOD NG SORSOGON,Mayo 2 (PIA) -- Patuloy pa rin ang regular na pagsubaybay ng Department of Trade and Industry (DTI) Sorsogon sa presyo ng mga pangunahing bilihin sa lalawigan ng Sorsogon.

Ayon kay DTI Sorsogon Provincial Director Leah Pagao, sa kabila ng kawalan nila ng tanggapan at tauhan sa mga bayan ng Sorsogon ay regular pa rin nilang nasusubaybayan ang halaga ng mga pangunahing pangangailangan at bilihin sa 14 na bayan sa pamamagitan ng tamang pag-aayos ng mga iskedyul at pagtatalaga ng masisipag na mga tauhang gagawa ng pagsubaybay.

Aniya, nagpapasalamat siya sa mga negosyante sapagkat wala silang naitatalang nagsasamantala sa halaga ng produkto at pangangailangan ng mga mamimili. Inihayag din niya na may ilang mga tindahan din ang nakakapagbigay pa ng masmurang halaga ng bilihin kaysa sa itinalagang Suggested Retail Price (SRP) nang hindi nasasakrispisyo ang kalidad at uri ng produkto.

Ang Price Monitoring ay isang epektibong paraan upang matulungang maayos na mabadyet ng mga mamimili ang kanilang perang pambili ng produkto, sapagkat nabibigyan ng malinaw na senaryo ang mga kunsumidor pagdating sa halaga ng mga bilihin sa iba-ibang mga pamilihan.

Malaking tulong ito sa mga regular na namamalengke para sa kanilang arawan o lingguhang kunsumo dahilan sa malalaman nila ang galaw ng mga presyo ng bilihin at nagagabayan din sila kung alin sa kanilang mga pangangailangan ang ipa-prayoridad.

Kabilang sa mga tinatawag na basic commodities ay ang mga delatang isda, prinosesong gatas, kape, sabong panlaba at panligo, asin, kandila at tinapay. Habang kabilang naman sa prime commodities ang mga prinoseso at delatang karne at baka, toilet soap, mga sawsawan, suka, toyo, noodles, baterya at posporo. Ang presyo ng mga bilihing ito ay pawang nasa ilalim ng pagsubaybay ng DTI.

Ayon pa kay Pagao, kung nais malaman ang SRP para sa mga pangunahing bilihin, maglog-on lamang sa www.dti.gov.ph at i-click ang suggested retail price at para naman sa pinakahuling presyo ng bilihin ay i-click ang Bantay Presyo o Price Watch.

Pinayuhan din nito ang mga mamimili na suriing mabuti ang timbang at ang mga nakalagay na price tag bago bilhin ang produkto.

Ayon pa sa kanya, sakaling may katanungan o reklamo ang publiko ay maaari silang makipag-ugnayan sa pinakamalapit na tanggapan ng DTI o di kaya’y tumawag sa numerong 421-5553 o itext ang kanilang hotline sa numerong 09272907771. (MAL/BAR/PIA5-Sorsogon)


Pagpapatuyo ng mga produkto sa lansangan, ipinagbabawal ng DPWH

By Benilda A. Recebido

LUNGSOD NG SORSOGON, May 2 (PIA) -- Muling ipinaalala ng Department of Public Works and Highways (DPWH) sa mga residente at mga negosyante na mahigpit na ipinagbabawal ang paggamit ng mga lansangan o kalsada sa pagbibilad o pagpapatuyo ng mga palay, kopra at iba pang mga produkto.

Ayon kay DPWH District I chief Engr. Romeo Doloiras, ito ay upang maiwasan ang anumang mga aksidente sa lansangan lalo na ng mga gumagamit ng motorsiklo.

Aniya, sa ipinalabas na Department Order No. 41 ng DPWH na may petsang Abril 12, 2013, muli nitong ipinaalala sa publiko ang mga probisyong nakasaad sa Section 23 ng Presidential Decree No 17 kung saan mahigpit na ipinagbabawal ang paggamit ng alinmang bahagi ng lansangan o kalsada, tulay at road right-of-way upang magbilad ng mga produkto lalo na ang mga palay. Kasama din sa ipinagbabawal ang paglalagay ng anumang bagay na maaaring makaharang sa maayos na daloy ng trapiko.

Ipinaliwanag din niya na hindi tumitigil ang DPWH sa paggawa ng mga hakbang upang maging maayos ang mga pambansang lansangan sa pamamagitan ng pagpapalapad pa nito nang sa gayon ay masmaging maginhawa ang mga motorista at hindi upang gawing solar dryer.

Partikular nilang tinukoy na sa inisyal nilang paglilibot, marami silang nakitang nagbibilad ng palay sa bayan ng Magallanes habang sa Bacon District, lungsod ng Sorsogon naman ay palay at kopra ang mga makikitang pinatutuyo sa lansangan.

Nakadadagdag pa umano sa panganib sa mga motorista ang mga bato at iba pang harang na inilalagay bilang proteksyon sa binibilad nilang produkto.

Nanawagan din si Doloiras sa mga opisyal at tanod ng lungsod, munisipyo at mga barangay na higpitan din ang kanilang nasasakupan sa pamamagitan ng pagpapalabas ng kautusan ukol sa pagbabawal sa paggamit ng lansangan o kalsada.

Matatandaang kamakailan lamang ay isang aksidente sa lansangan ng Trece Martires sa Casiguran, Sorsogon ang naitala kung saan dalawang buhay ang nabuwis dahil sa pag-iwas umano ng tsuper sa isang residente na nagbibilad ng palay.

Sinabi din ni Engr. Doloiras sinumang mapapatunayang lumabag sa nasabing kautusan ay mahaharap sa kaukulang multa sa halagang di tataas sa isang libong piso o pagkakakulong ng anim na buwan. (MAL/BAR/PIA5-Sorsogon)


CELA para sa socialised housing sa bayan sa Albay, ipinamahagi

By Joseph John J. Perez

LUNGSOD NG LEGAZPI, Mayo 2 (PIA) -- Pinangunahan ni Bise Presidente Jejomar Binay ang pagbibigay ng Certificate of Lot Award (CELA) sa 321 mga benepisyaryo sa bayan ng Sto. Domingo, Albay noong linggo sa susog sa layunin ng pamahalaan na mabigyan ng sariling lupa ang mga walang tirahan.

Ang pamimigay ng CELA ay sa ilalim ng Presidential Proclamation No. 40 na nagdeklara na ang hindi na ginagamit na lupain ng Philippine National Railways (PNR) sa probinsiya ng Albay ay gawing lugar para sa socialized housing sa mga kwalipikadong benepisyaryo.

“Ang proklamasyong ito ay nagbibigay pahintulot upang gawing socialized housing ang mga lupa na pag-aari ng PNR na hindi na nila ginagamit o gagamitin pa,” sabi ni Binay.

Ang tatlong barangay sa Sto. Domingo na nabenepisyuhan sa pamamahagi ay ang San Andres, Bagong San Roque at Fidel Surtida.

Ayon kay Housing Urban Development Coordinating Council (HUDCC) Regional Officer Engineer Cristy Abaño, mahigit 139 ektarya ang lawak ng nasabing proklamasyon na sakop ang mga abandonadong riles ng PNR na tumatagos sa mga lungsod ng Legaspi at Tabaco at mga munisipyo ng Malilipot, Bacacay, Sto. Domingo, Daraga at Camalig na may kabuuang 5,850 na benepisyaryo.

“Mahigit sa 23 ektarya ng lupain ng PNR ang sakop sa pamamahagi,” sabi ni Abaño. Ipinamahagi ang lupain sa ilalim ng direct purchase scheme sa pamamahala ng National Housing Authority (NHA), ayon kay Abaño.

Ang dami ng benepisyaryo ay maaaring tumaas o bumaba sanhi ng pag-aasawa ng mga kasamahan sa bahay na nanatiling nakatira doon, pagkamatay ng puno ng pamilya, pangingibang bayan at ang deklarasyon ng Mines and Geosciences Bureau (MGB) at ng Philippine Institute of Volcanology and Seismology (PhiVolcs) na danger area ang lugar, ayon kay Abaño.

“Maraming salamat po sa Local Inter-agency Committee na pinamumunuan ni Mayor Herbie Aguas at sa iba pang ahensiyang tumulong sa pagsasakatuparan ng proyektong ito kasama na ang HUDCC, NHA, PNR at Presidential Commission for the Urban Poor (PCUP),” sabi ni Binay.

Pinaalalahanan din ni Binay ang mga benepisyaryo na pagsikapang bayaran ang buwanang hulog ng walang palya. “Balang araw ay matatanggap na ninyo ang titulo ng lupa na isang napakahalagang bagay sa ating mga Pilipino,” ayon pa kay Binay. (MAL/JJJP-PIA5/Albay)

Kabuuang bilang ng krimen sa Bikol, bumaba ng 6%

LUNGSOD NG LEGAZPI, Abril 30 (PIA) -- Bumaba ng anim na porsyento ang bilang ng naitalang krimen sa rehiyong Bicol sa unang tatlong buwan ngayong 2013, ayon kay Bicol police regional spokesman P/Supt. Renato Bataller sa isang panayam sa kanya noong nakaraang linggo.

Ayon kay Bataller, mula Enero hanggang Marso, mayroong naitalang 2,419 na bilang ng krimen sa buong rehiyon. Naitala ang 155 na insidente o katumbas ng anim na porsyento ang ibinaba nito mula sa 2,574 na insidenteng naitala noong Enero hanggang Marso noong nakaraang taon.

Ayon sa tala ng PNP sa rehiyong ito, sinabi ni Bataller na, ngayong taon, mayroong kabuuang bilang na 1,390 na mga kaso ang index crimes o mga kasong paglabag sa revised penal code, mababa ng 115 kumpara sa 1,505 na naitalang kaso noong 2012.

Samantala, 655 naman ang napapabilang sa non-index crimes o mga krimeng paglabag sa special laws at mga local ordinances. Bumaba ito ng 66 na kaso o katumbas ng 9.15 percent.

Ito ay mababa kumpara sa 721 na naitalang kaso ng non index crime noong nakaraang taon.

Sinabi rin ni Bataller na kagaya ng mga nakalipas na taon, physical injury pa rin ang may pinakamataas na crime volume. Mayroon itong 547 na kabuuang bilang, sinundan ito ng pagnanakaw na mayroon namang 397 na kaso, 215 para sa robbery, sinundan ito ng rape na mayroong 77 na kaso, at panghuli ang homicide na mayroon lamang 25 na kaso.

Idinagdag pa ni Bataller na ang Albay ay ang may pinakaraming naitalang insidente ng krimen sa kaabuuang bilang na 540, sinundan naman ito ng Masbate na mayroong 511 na kaso.

Samantala, ang Sorsogon ay ang may pinakamababang bilang ng krimen na naitala mula Enero hanggang Marso ngayong taon. Mayroon lamang itong 118 na naitalang kaso, pinalitan nito ang Catanduanes na dati ay mayroon lamang 105 na naitalang kaso—ang pinakamababang bilang ng krimen na naitala noong nakaraang taon.

Sa kabuuang bilang na naitalang krimen, 675 na kaso dito ang naresolba na kumakatawan sa crime solution efficiency rate na 27.9 percent, mataas kumpara sa 25.8 percent rate mula pa rin noong Enero hanggang Marso ng nakaraang taon.

Dagdag pa ni Bataller ang pagbaba ng crime volume at ang pagtaas ng crime solution ay resulta lamang ng determinasyon ng PNP dito sa Bikol na masugpo ang krimen.

Subalit ayon pa rin dito, inaasahang tataas ito ngayong papalapit na ang eleksyon.

Ayon sa kanya, isang hamon ito sa mga kapulisan at iba pang tagapagtaguyod ng kapayapaan na mas paigtingin pa ang kampanya laban sa krimen. (MAL/MZEser-OJT-BU/PIA5)