Tagalog news: Charitable arm ng Katoliko sa Masbate, hinihiling sa citizen groups na magsanib pwersa laban sa political violence

By Ernesto A. Delgado

LUNGSOD NG MASBATE, Abril 15 (PIA) -- Nanawagan ang charitable arm ng Simbahang Katoliko sa Masbate ng pagsasanib pwersa ng grupo ng mamamayan para itaguyod ang kapayapaan sa panahon ng kampanya at botohan sa Mayo 13.

Ayon sa executive director ng Caritas Masbate Foundation na si Msgr. Claro Caluya III, kailangan nagkakaisa ang "citizen groups" sa pagsuporta sa mga naatasang magsagawa ng halalan sa Mayo upang mangibabaw ang kapayapaan sa Masbate na ginulantang ng serye ng pamamaslang sa ilang kandidato.

An pundasyon anya ng demokrasya ay ang malayang pag-ehersisyo ng isang mamamayan sa kanyang karapatan sa paghalal.

Inaanyayahan ng pinuno ng Caritas ang mga lider ng citizen groups sa isang pag-uusap na itinakda sa darating na Lunes upang pormal na maikasa ang pagkakaisa laban sa karahasan na dulot ng matinding tunggalian sa pulitika.

Nasa likod ng pagkilos ng Caritas ang Commission on Elections, Philippine National Police at hukbong katihan. (MAL/EAD-PIA5 Masbate)


Mahigit 100 baril, nakumpiska sa Camarines Sur bunsod gun ban


By Danilo C. Abad

LUNGSOD NG NAGA, Abril 15 (PIA) -- Mahigit isang daang baril ang nasa pag-iingat na ngayon ng Philippine National Police (PNP) sa Camarines kaugnay ng mahigpit na pagpapatupad nito ng gun ban sa lalawigan.

Kahapon, humarap sa media si PNP Camarines Sur officer-in-charge PSSupt. Ramir Bausa, kasama ang namumuno ng Scene of the Crime Operation (SOCO) ng PNP Crime Laboratory na si PCInsp. Ariel Ayusip at ipinakita ang mga nasabing nakumpiskang baril sa mga miyembro ng lokal na media dito.

Ayon kay Bausa, ang nasabing bilang na baril ay nasamsam sa loob lamang ng election period simula noon ENero 13, 2013.

Kasama sa mga ito ang ibat uri at kalibre ng baril gaya ng snub nose caliber .22, shot gun at improvised na sumpak.

Inihayag ni Bausa na kanyang ipinagmamalaki ang patuloy na pagpapatupad ng naturang kampanya sa iba't ibang istasyon ng pulis sa pamumuno ng mga hepe ng pulisya.

Aniya, malaki ang maitutulong nito upang mapanatili ang katiwasayan at kapayapaan sa mga kanayunan ngayong darating na eleksyon.

Karamihan sa mga baril ay nakumpiska sa mga check points na inilagay ng PNP sa iba’t ibang stratehikong lugar sa lalawigan. Ang ilan sa mga ito ay pansamantalang isinuko sa pulisya ng mga may ari nito dahil hindi pa nairehistro.

Labing-lima sa mga baril na nasamsam ay napagalamang ginamit na sa iba’t ibang krimen sa pagpasok pa lamang ng election period.

Samantala, inihayag naman ni Ayusip na ang nasabing 15 baril ay nasa pag-iingat na rin ng kanyang tanggapan at dahil ginamit sa insidnte ng pamamaril, ipinasailalim na sa search warrant ang mga may ari nito.

Kakasuhan naman ng illegal possession of firearms o ang paglabag sa Commission on Elections Gun Ban ang mga may ari ng ng mga kumpiskadong baril samantalang kasong homicide at murder naman sa sino mang gumamit ng mga naturang baril sa paghohold-up at indiscriminate firing.

Ikinatuwa naman ng pamunuan ng PNP sa Camarines Sur ang pagiging masipag ng mga hepe ng pulisya sa pagtupad sa kanilang tungkulin. Pinasalamatan din ni Bausa ang taong bayan sa patuloy na suporta ng mga ito sa mga programa ng PNP. Umaasa din ang ang mga ito na maging matahimik at matiwasay ang halalan ngayong Mayo 13, 2013. (MAL/LSM/DCA-PIA5 Camarines Sur)

Tagalog news: Araw ng Kagitingan pinangunahan ng PNP Sorsogon

By Benilda A. Recebido

LUNGSOD NG SORSOGON, Abril 13 (PIA) -- Pinangunahan ng Philippine National Police (PNP) Sorsogon Police Provincial Office Police Community Relations ang isang simpleng aktibidad bilang paggunita sa Araw ng Kagitingan noong Abril 9.

Alas otso nang simulan ang panalangin na sinundan ng pag-awit ng Lupang Hinirang, ang Pambansang Awit ng Pilipinas.

Si Governor Raul R. Lee ang nagbigay ng welcome remarks habang naatasan namang magbigay ng closing remarks si Col. Joselito E. Kakilala, ang Brigade Commander ng 903rd Philippine Army.

Nagbigay ng mensahe si PNP Sorsogon Police OIC Provincial Director Ramon S. Ranara na layuning pukawin ang kamalayan ng publiko ukol sa ginawang kabayanihan ng mga magigiting na sundalo at sibilyang Pilipino noong panahon ng Hapon na nakipaglaban at nag-alay ng kanilang sarili para sa kalayaan at demokrasya ng bansang Pilipinas.

Nakiisa sa pagdiriwang ang mga World War Veteran ng Sorsogon at mga kawani ng kapitolyo.

Ang Araw ng Kagitingan na kilala din sa tawag na “Bataan Day” o “Bataan and Corrigedor Day” ay ginugunita taon-taon tuwing ika-9 ng Abril bilang pambansang aktibidad.

Taong 1961 nang ipasa ng Kongreso ang Republic Act 3022 na nagdedeklara ng ika-9 ng Abril taon-taon bilang Araw ng Bataan o “Bataan Day.” Subalit noong taong 1987, sa bisa ng Executive Order 203, narebisa ang lahat ng national holiday sa bansa at napalitan ang “Bataan Day” at naging “Araw ng Kagitingan”. (MAL/BAR-PIA5 Sorsogon)


Tagalog news: Bilang ng turista sa lungsod ng Naga, inaasahan tataas

By Danilo C. Abad

LUNGSOD NG NAGA, Abril 13 (PIA) -- Inaasahang tataas ang bilang ng mga turista na dadagsa na naman dito ngayong Abril at sa mga susunod pang buwan ngayong taon dahil sa mga bagong eco-tourism sites katulad ng mga paliguang dagat at bukal, theme park at iba pa.

Ayon kay Alec Santos, hepe ng Arts Culture and Tourism Office (ACTO) dito, humigit kumulang sa 200,000 lokal at dayuhang turista ang kanilang inaasahang dadagsa at mamamasyal sa lungsod.

Kabilang sa mga listahan ng mga paboritong destinasyon dito ay ang Panicuason Hot Spring and Resort, Malabsay falls at ang bagong Haciendas De Naga na Cool Wave Resort, eco-tourism park at iba pang mga kalapit pook na may magagandang tanawin.

Sinabi ni Santos na umabot na sa 51 porsiyento ang naitalang pagtaas ng tourist arrival sa unang bahagi ng taon kumpara sa mga nakalipas na taon 2010 kung saan nagkaroon lamang ng 37 porsiyento at 43 porsiyento naman noong 2012.

Noong nakalipas na buwan na Marso, inilunsad ng lokal na pamahalaan ng Naga-X o Naga City Excursion Tourism Package.

Ayon Santos, kabilang sa tourism package ay ang tatlong araw at dalawang gabing pagbisita sa mga magagandang resorts sa loob ng lungsod at karatig na mga bayan o mga munisipyong nasasakupan ng Metro Naga. Kasama rin sa package ang personal services, hotel accommodation at resto services.

Samantala, binanggit din ni Pangulong Benigno S. Aquino lll ang pagdagsa ng mga turista sa Bicolandia noong bumisita siya dito noong nakalipas na buwan.

Sa kanyang talumpati, sinabi ni Pangulong Aquino na ang debosyon kay Nuestra Señora de Peñafrancia taon-taon ang isa sa mga dinarayo ng mga turista at domestic visitors. Nabanggit din ng Pangulo ang pag-unlad ng Caramoan Peninsula sa lalawigan ng Camarines Sur na naging pangunahing tourist destination sa bansa.(MAL/LSM/DCA-PIA5 Camarines Sur)

Tagalog news: Mamamahayag, maaari ng magpa-akredit sa COMELEC ng Camarines Norte

By Reyjun Villamonte

DAET, Camarines Norte, Abril 12 (PIA) -- Maaari ng magsadya ngayon sa tanggapan ng Commission on Elections (Comelec) dito ang mga mamamahayag mula sa istasyon ng radyo, mga pahayagan at lokal na telebisyon sa lalawigan ng Camarines Norte. 

Ito ay para sa pagsusumite ng Media Accreditation para sa isasagawang halalan sa darating na Mayo 13 ngayong taon. 

Ayon kay Provincial Election Supervisor Atty. Romeo G. Serrano, ang huling araw ng pagsusumite ng aplikasyon ay hanggang Abril 15 lamang sa tanggapan ng Comelec dito sa kapitolyo probinsiya. 

Aniya, kailangan sa isusumiteng aplikasyon ang dalawang 2x2 na larawan na colored kasama ang rekomendasyon mula sa kanilang Station Manager, Publisher o Editor. 

Ang application form ay maaaring makuha sa website ng Comelec o magsadya sa naturang tanggapan. 

Ito ay batay sa Resolution no. 9649 o Guidelines for Mass Media Accreditation in Connection with the May 13, 2013 automated national and local elections. (MAL/ROV-PIA5)



Tagalog news: Babaeng OFWs sa Bicol dumarami– OWWA

By Marlon A. Loterte

LUNGSOD NG LEGAZPI, Abril 12 (PIA) -- Dumarami ang bilang ng mga kababaihang nagtatrabaho sa ibang bansa kumpara sa bilang ng mga kalalakihan, ayon sa tanggapan ng Overseas Workers Welfare Administration (OWWA) sa rehiyong Bicol.

“Naitala namin ang patuloy na pagdami ng kababaihang overseas Filipino Workers (OFWs) at karamihan sa kanila ay domestic helpers sa ibang bayan,” ito ang sinabi ni OWWA Bicol Regional Director Jocelyn Hapal sa isang panayam sa programa sa radio na “Aramon Ta Daw” ng Philippine Information Agency (PIA-5).

Noong buwan ng Pebrero ng taong kasalukuyan, naitala ng OWWA Membership Processing Center Region 5 ang kabuuang bilang ng mga OFW sa rehiyon na 58,590, kabilang ang 31,075 kababaihan masmataas sa naitalang bilang ng kalalakihan na umabot lamang sa 27,515.

Nanguna sa talaan ang Camarines Sur na mayroong 13,570 kababaihang OFWs na sinundan ng Albay na mayroong 8,349 at pangatlo ang Sorsogon na mayroong 3,431. Sinundan ng Camarines Norte ang Sorsogon na mayroong 2,998, Catanduanes na mayroong 1,458 at Masbate ang mayroong pinakakonting kababaihang OFWs na mayroon lamang ng 1,269.

Maliban sa pagiging domestic helpers, karamihan sa mga Bikolanang OFWs ay namamasukan bilang caregivers at mga nars, bilang pangalawa at pangatlong nangungunang napipiling trabaho sa ibang bansa. Ang mga pangunahing tatlong bansang destinasyon ng mga bikolana OFWs ay ang United Arab Emirates, Saudi Arabia at Hongkong, ayon kay Overseas Worker Welfare Officer Mayan Trilles.

“Pinipili ng mga kababaihang OFWs na magtrabaho sa ibang bansa dahil sa kakulangan ng mga oportunidad na magkaroon ng trabaho sa ating bayan at ang maliit na pasahod,” ayon kay Hapal.

Mayroong 30,793 na mga bikolanang OFWs na nagtatrabaho sa kalupaan o land-based at 282 naman ay nagtatrabaho sa karagatan o sea-based, ayon sa OWWA Region 5.

Samantala sa kabuuang 27,515 ng mga kalalakihang OFWs, 17,710 ay nagtatrabaho sa kalupaan o land-based at 9,805 ay nagtatrabaho sa karagatan o sea-based.

Nangunguna pa rin ang Camarines Sur sa talaan na mayroong 11,262 na kalalakihang OFWs, na sinundan pa rin ng Albay na mayroong 8,258 at Sorsogon na mayroong 3,085. Sinundan naman ng iba pang probinsiya sa Bikol ang talaan na mayroong 2,581 kalalakihang OFWs ang Camarines Norte, 1,392 galing sa Masbate at 937 naman ang mula sa Catanduanes ayon sa talaan ng OWWA Membership Processing Center in Bicol Region. (MAL/JJP-PIA5)